"Hazırlıqlı olun, güclü zəlzələ olacaq" - Hökumət əhaliyə XƏBƏRDARLIQ ETDİ

Yaponiyada yaxın vaxtlarda güclü zəlzələnin baş verə biləcəyi ilə bağlı xəbərdarlıq edilib.

Bu barədə Yaponiya hökumətinin Zəlzələlərin Tədqiqi Komitəsinin mütəxəssisləri açıqlama veriblər. Məlumat Yaponiyanın NHK televiziya kanalı və digər yerli media orqanlarında yayılıb.

Bildirilib ki, ölkənin şimal-şərqində yerləşən Aomori prefekturası sahillərində müşahidə olunan geoloji proseslər seysmoloqları narahat etməyə başlayıb. Ekspertlərin sözlərinə görə, bölgədə tektonik plitələrin hərəkəti ilə bağlı “yavaş sürüşmə” (slow slip) adlanan proses sürətlənib.

Yapon alimləri qeyd edirlər ki, bu cür proseslər bəzi hallarda daha böyük və dağıdıcı zəlzələlərin xəbərçisi hesab olunur. Xüsusilə də aprelin 20-də Aomori sahillərində qeydə alınan 7,7 bal gücündə zəlzələdən sonra bölgədə geoloji aktivliyin artdığı bildirilir.

Mütəxəssislərin fikrincə, tektonik plitələrin yerdəyişməsi daha da intensivləşərsə, 7 və hətta 8 baldan yuxarı gücə malik zəlzələlərin baş vermə ehtimalı artır.

NHK-nın məlumatına görə, Yaponiya Meteorologiya Agentliyi və hökumətin seysmoloji qurumları vəziyyəti xüsusi nəzarətdə saxlayır. Yerli hakimiyyət orqanlarına mümkün fövqəladə vəziyyətə hazır olmaq tapşırılıb.

Qeyd edək ki, Yaponiya dünyada seysmik aktivliyin ən yüksək olduğu ölkələrdən biridir. Ölkə Sakit okean “Od halqası” adlanan seysmik zonada yerləşdiyi üçün burada tez-tez güclü zəlzələlər baş verir.

Xatırladaq ki, 2011-ci ildə Yaponiyanın şimal-şərqində baş verən 9 bal gücündə zəlzələ və sunami nəticəsində on minlərlə insan həlak olmuşdu. Həmin fəlakət “Fukusima-1” Atom Elektrik Stansiyasında böyük qəzaya səbəb olmuşdu./yenisabah/